38 Waktu Yesus deng Antua pung murid-murid bajalang dar kampong ka kampong, Antua dong sampe di Jemaat GPM Ahanari, satu jemaat GPM di daratan Babar Timur (Klasis Pp. Babar)1. Ada satu parampuang nama Marta yang su kenal Yesus dapa dengar. Ia capat-capat baku dapa Yesus deng por mo undang. Pas malam itu ada mo biking ibadah syukur satu tahun Marta pung ana yang nomor lima. Samua orang su dapa undang; Majelis Jemaat lengkap, Pemerintah Desa, orang tua-tua, guru-guru, pengurus unit pelayanan, dll. Amper satu kampong. Samua orang su ada. Lalu Yesus sampe deng Antua pung murid-murid. Waktu masuk, Yesus ucap “Lem’mel”2. Orang-orang kaget, tapi dong balas “Lem’mel, mai po..” Marta pung laki kasih Yesus deng murid-murid dudu di bangku dimuka, sama-sama unsur Tiga Batu Tungku. Acara su mau mulai. Diam-diam, Majelis Jemaat su atur por minta Yesus yang pimpin ibadah. Penatua bertugas yang mo undang Yesus por mulai ibadah baku bisi deng Pengurus Unit, supaya bilang Marta por taru “piring nazar” di meja. Murid-murid Yesus tanya-tanya, ada apa ? lalu bapa guru satu bilang biasa disini kalo mo ibadah baru dong taru piring nazar di meja.
39 Marta pung sodara nama Maria. Dong sama-sama ator makan-minum deng keluarga. Nanti keluarga bawa goreng-goreng tambah belanga lai. Su biasa bagitu. Malam itu parampuang-parampuang paleng sibuk di dapor. Baribut slaki tamba bunyi piring, glas, sendo deng balanga. Sebagai mama, Marta paleng sibuk di dapor. Dalam Marta pung hati, samua pelayanan musti bae. Sampe-sampe dia seng tenang, apalagi Yesus deng Antua pung murid-murid ada lai. Jang sampe makanan seng cukup atau seng enak. Babi yang bunuh satu lol3. Deng rampa-rampa jua seng kaya di kota. Pokonya, samua musti puas. Payo4….., beta seng mau malu”, Marta pung mulu tutu-buka. Marta memang paleng sibuk deng perempuan-perempuan di dapor. Jadi, Marta suru Maria ambel piring nazar di kamar tidor, lalu taruh diatas meja. Maria langsung cepat-cepat ambel, lalu taru diatas meja supaya ibadah mo mulai. Waktu Maria kaluar dar kamar tidor, Yesus su siap-siap mulai ibadah. Maria paleng malu hati deng rasa seng enak. Tapi, waktu Maria lia wajah Yesus, ia kaya seng bisa biking apa-apa. Maria hamper seng pusing deng orang-orang banyak yang ada dudu. Dia lupa karja di dapur. Dia langsung bilang dalam hati por mo ada deka Yesus. Samua heran-heran deng satu nganga satu. Tampa su pono. Maria seng pantas dudu deng unsur Tiga Batu Tungku. Maria kaya seng sadar, langsung dudu di tana por dengar Yesus bicara. Tau-tau Marta dapa dengar di dapur dar parampuang-parampuang yang dapa lia Maria di dalam. Marta seng bisa biking apa-apa, tapi rasa emosi campor malu. Hati Marta tamba saki waktu abis ibadah, parampuang-parampung dong antar makanan yang su timba di piring lalu bagi-bagi par samua yang hadir. Maria tetap tampa deng seng sibuk. Dia trus pasang teling por dengar Yesus cerita deng orang-orang yang ada malam itu.
40 Waktu acara abis, Marta cepat-cepat rapat Yesus por bisi-bisi; “Yesus, jang pulang dolo. Beta mo bilang apa-apa”. Orang-orang samua su pulang, tinggal Yesus deng Antua pung mirid-murid tamba keluarga dekat sa. lalu Marta datang deka Yesus deng dukung-dukung ana yang baru satu taong. Ana itu tadi manangis, tapi dia pung bapa seng kuat buju. Marta goyang-goyang ana sampe su dapa todor, lalu dia minta maaf deng bicara; “ Yesus, beta su anggap kaya keluarga. Katong paleng menghormati Yesus. Tapi, mangapa waktu Maria dudu-dudu saja di dekat Yesus deng dia seng sibuk bantu katong, Yesus seng marah dia ? Biking malu-malu sa ! Lia, yang dudu tadi itu orang-orang besar deng laki-laki samua. Tampa parampuang di dapur por ator makan-minom. Jadi tolong bicara por dia, jang sampe dia biking ulang lai. Biking malu-malu sa !”
41 Tapi Yesus bilang; “Ata, Ata, ose seng mau mengerti apa yang harus ose biking, jadi biking susah ose pung diri sendiri deng banya sibuk, dengan banya masalah”. Marta potong Yesus pung bicara; “Tapi …., Yesus, ini katong pung kebiasaan. Nanti orang bilang apa ? Yesus, beta paling malu hati murid-murid Yesus yang laki-laki samua itu. Pasti, esok Yesus dengan murid-murid su pigi, baru orang tua-tua bakalai Maria. Nanti lia sa, apa yang jadi por Maria gara-gara dia pung kalakuang.
42 Yesus bicara lanjut; “diantara samua masalah deng kesibukan por ibadah syukur satu taong ose pung ana, ada satu yang perlu, Maria su pilih bagian yang paleng bae, yang seng bisa diambil dari dia”. Jasi Maria seng salah. Jang marah dia Ata !
Marta tamba seng mangarti. Waktu Marta mo tanya lagi, Yesus bilang; “Beta tau di Ahanari deng di tampa-tampa laeng kalo bikin ana pung syukur satu taong, termasuk makan-minom lebih lai dar syukur ultha yang laeng. Mama deng papa paleng sibuk. Sampe-sampe ada yang pi kasih tinggal kampong mo cari wang por ana pung syukur satu taong. Beta dengar, ada laki yang pigi seng bale-bale sampe ada kabar su keweng lai di tampa laeng. Waktu ibadah cuma laki-laki yang duduk di tampa acara. Parampuang cuma sibuk di dapor, jadi seng dapa dengar dengar firman Tuhan. Dong samua sibuk deng makanan jasmani daripada makanan rohani. Beta tadi bicara banya, tapi dong di dalam sa yang dengar. Inga, ose pung anana deng samua anana dalam jemaat ini jang kasih makan deng makanan jasmani sa, tapi anana itu musti kasih makan makanan rohani. Mulai dar dong masih kacil. Lia, skarang anana susah diatur, dong jua jaga saki-saki, dong salalu patah ditengah jalan. Ada yang trus putus skolah. Dong pung masa depan kabur. Lalu sapa yang mo tanggung jawab ? Beta, unsur Tiga Batu Tungku ataukah Ata deng laki ?”
Marta diam deng tundu langsung. Ia seng sanggup jawab Yesus pung pertanyaan. Marta pung dalam hati bilang; payo.., ini kebiasaan yang salah. Beta musti sadar. Tapi, kalo beta bilang vor parampuang-parampung lain yang tua deng muda, asal dong mo dengar ? Apalagi vor laki-laki yang tua deng muda !
Yesus tanya lai; Ata, mana anana pung bapa ? Tukang mabok lai ka ?
Ata pung laki senyum-senyum deng malu-malu, lalu tundu sapu-sapu tangan kiri pake tangan kanan. Keluarga yang masih ada sama-sama tatawa. Ada yang bilang; Yesus, jago itu. Ada yang tatawa lai. Yesus kasih inga, “jang baribut lai. Anana su tidor, esok dong sekolah to ?
Malam tamba lat. Yesus deng Antua pung murid-murid kasi suara vor mo pulang. Dong samua baku pegang tangan deng ucap “Lem’mel. Esoknya, Antua dong mo lanjutkan perjalanan ka Wakpapapi, Kokwari, Letwurung dan seterusnya. Marta mengucapkan terima kasih atas kehadiran Yesus deng Antua pung murid-murid. Dengar-dengar, Antua dong mo tunggu Km. Maloli5 di Letwurung, tapi kalo lama sadiki, Antua dong mo pi di pulau Marsela deng pulau Dawelor-Dawera lai.
Tidak ada komentar:
Posting Komentar